ئەللەي بالام ئەللەي

ئاللاھ بەرگەن نېئمەتسەن، ئەللەي بالام ئەللەي

گۆھەردىنمۇ قىممەتسەن، ئەللەي بالام ئەللەي

دىنىم ئۈچۈن تۆھپەمسەن، ئەللەي بالام ئەللەي

سەن كەلگۈسى ئۈممەتسەن، ئەللەي بالام ئەللەي

يالغۇز ئەمەس بۇ باشىڭ، ئەللەي بالام ئەللەي

پەيغەمبەردۇر يولباشىڭ، ئەللەي بالام ئەللەي

ئاتا ئاناڭ سىرداشىڭ، ئەللەي بالام ئەللەي

مۇئمىنلەر قېرىنداشىڭ، ئەللەي بالام ئەللەي

زېمىن ساڭا راسلار ئاش، ئەللەي بالام ئەللەي

پەرۋىش قىلار ئاي قۇياش، ئەللەي بالام ئەللەي

قوغدار سېنى پەرىشتە، ئەللەي بالام ئەللەي

خىزمەتكاردۇر تاغۇ تاش، ئەللەي بالام ئەللەي

بولسۇن ئاللاھ يادىڭدا، ئەللەي بالام ئەللەي

قۇت ئىقبالىڭ ئالدىڭدا، ئەللەي بالام ئەللەي

پاكلىق بولسۇن زاتىڭدا، ئەللەي بالام ئەللەي

شان-شەرەپ بار قانىڭدا، ئەللەي بالام ئەللەي

ئاللاھ بەرسۇن ئىمانىڭ، ئەللەي بالام ئەللەي

نۇرغا تولسۇن ئېقبالىڭ، ئەللەي بالام ئەللەي

ھالال بولسۇن ئاشلارىڭ، ئەللەي بالام ئەللەي

ئاسان بولسۇن ئىشلارىڭ، ئەللەي بالام ئەللەي

ھۆر يارالدىڭ ئالەمگە، ئەللەي بالام ئەللەي

نۇر تولدۇردۇڭ خانەمگە، ئەللەي بالام ئەللەي

خەلقىڭ كۈلسۈن تۆھپەڭگە،ئەللەي بالام ئەللەي

شەيتان چۆمسۇن ماتەمگە، ئەللەي بالام ئەللەي